V Дүниежүзілік көшпенділер ойындарына 50 күн қалды

Жылдың ең маңызды әрі ауқымды әлемдік спорттық шарасы – V Дүниежүзілік көшпенділер ойындарының басталуына 50 күн қалды. Көшпелілер мәдениетінің бірегей мерекесі саналған әлемдік оқиға дәстүр мен заманауи жетістіктерді насихаттау мақсатында әлемнің түкпір-түкпірінен қатысушылар мен көрермендердің басын біріктіреді.

Әлемдік спорт шарасына 89 елден 2000-нан астам спортшы қатысады деп күтілуде. Астанада өтетін Дүниежүзілік көшпенділер ойындарында 21 спорт түрінен 97 медаль жиынтығы сарапқа салынды.

Қазіргі таңда Ойындарға дайындық қызу жүріп жатыр. Басты бәсекеда спортшылар қазақ күресі, алыш (қырғыз күресі), көрәш (татар күресі), дәстүрлі садақ ату, асық ату, ордо, таяқ тарту, күрәш (өзбек күресі), арқан тартыс, ашыртмалы аба гүреші (түрік күресі), көкпар, көк бөрі, бәйге, жамбы ату, теңге ілу, аударыспақ, құсбегілік, алыптар сайысы сынды сайыстармен сынға түседі.

Ойынның маңызды бөлігінің бірі «Бірлік керуені» мәдени бағдарламасы. Бұл бірегей жоба көшпелі халықтардың мәдени байлығы мен алуан түрлілігін көрсетуге бағытталған.

Еске салсақ, дүниежүзілік көшпенділер ойындарына қатысатын Қазақстанның ұлттық құрамасы соңғы дайындық-жаттығу жиындарын өткізуде.