Абель Санчес: Головкин ринг cыртында да ұлы тұлға екенін дәлелдеді

Атақты бапкер Абель Санчес өзінің бұрынғы шәкірті, қазақстандық бокс аңызы Геннадий Головкиннің мансаптан кейінгі жетістіктеріне жоғары баға берді, деп хабарлады Sport12.kz 

Головкин қазіргі таңда халықаралық World Boxing ұйымының президенті болып, әуесқой бокстың Олимпиада бағдарламасында қалуына үлкен үлес қосты.

WBN басылымына берген сұхбатында Санчес Головкинге қатысты мақтаныш сезімін жасыра алмады:

— Мен осы ақылды әрі ұлы спортшының мансабына үлес қосқаным үшін мақтанамын. Геннадий рингте ғана емес, одан тыс та ақылымен, нақты істерімен ерекшеленіп жүр. Көптеген боксшылар мансаптан кейін көмектесеміз деп уәде береді. Бірақ сонымен тоқтап қалады. Ал Головкин уәде етпейді. Бірден іске кіріседі. Өте қуаныштымын, — деді Санчес.

Айта кетейік, Геннадий Головкин кәсіби спорттағы жолын аяқтағаннан кейін, халықаралық бокс қауымдастығында жетекшілік қызметке келіп, жаһандық деңгейде боксшылардың құқықтары мен әуесқой спорттың дамуына атсалысып жүр.