Толқын Киличев: Қазақстан боксшыларымен Әлем чемпионатында жолығамыз

Өзбекстан құрамасының бас бапкері Толқын Киличев Қазақстанда өтетін Әлем кубогының кезеңіне не себепті келмегенін түсіндірді, деп хабарлайды Sport12.kz

– Біз дайындықты өз жоспарымызға сай жүргізіп жатырмыз. Соңғы жарты жылдағы көрсеткіштерді саралап, кімге қанша жекпе-жек қажет екенін бағаладық. Кейбір спортшыларда тәжірибе аз болды. Сондықтан оларды Нидерландтағы Эйндховен турниріне жібердік. Әрқайсысы кемінде үш жекпе-жек өткізді. Бұл Ливерпульде өтетін жаһандық доданың алдындағы дайындықтың бір бөлігі болды.

Қазақстанға келу жоспарда болған жоқ. Өйткені бұл дайындық кестемізге кедергі келтіріп, жарақаттар қаупін арттыруы мүмкін еді.

Шешіміміздің саясатқа не басқа себептерге қатысы жоқ. Қазақстанмен арада әрдайым жылы қарым-қатынас бар. Боксшыларымыз бірге өсіп келеді. Абылайхан Жүсіповті жас кезінен білемін.

Өзбекстан мен Қазақстан боксшылары әлемдік және құрлықтық жарыстарда әлі талай мәрте жолығады. Барша спортшыларға тек сәттілік тілеймін. Олардың есімдері әлемдік бокстың тарихында қалсын деп тілеймін, – деді Киличев.

Айта кетейік, Астанада алғаш рет ұйымдастырылып жатқан Әлем кубогы кезеңіне 29 ел қатысуға ниет білдірді.