5 боксшымыз Әлем чемпионатында дебют жасайды

Бокстан 3-13 желтоқсан күндері аралығында Дубайда (БАӘ) өтетін әлем чемпионатында Қазақстанның құрамы белгілі болды, деп хабарлайды Sport12.kz

Неше боксшымыз қатысады?

Қазақстан ерлер құрамасы бір жыл ішінде екінші рет әлемдік аренаға шығады. Бұған дейін 10 спортшымыз қыркүйек айында Ливерпульде жүлде үшін жұдырықтасқан болатын. Дубайда да бәсеке жоғары болғалы тұр. 13 салмақта жүлде жиынтығы сарапқа салынады. Команда сапында тәжірибелі чемпиондармен қатар, бірінші рет додаға қатысатын жастар да бар. Олардың арасынан 63,5 келідегі Ертуған Зейнуллинов пен 75 келідегі Сабыржан Аққалықов бір жылда екінші рет әлем чемпионатына барады.

Құрам қаншалықты тәжірибелі?

Тізімге іліккен спортшылардың арасынан Теміртас Жүсіпов пен Сәкен Бибосынов 2021 жылы чемпион атанып үлгерсе, Серік Теміржанов пен Абылайхан Жүсіпов еншісінде жүлде бар.

48 келі. Теміртас Жүсіпов (1 алтын). 2 айдан кейін 38 жасқа толғалы отырған спортшы өз мансабында екінші мәрте әлем чемпионатының жүлдесіне таласып көрмек. 2021 жылы ол Сербия төрінде топ жарып, қазақ боксының тарихындағы ең жасы үлкен әлем чемпионы атанған еді. Бір қызығы, ең жеңіл салмақта қазақ спортшылары 2021, 2023 және 2025 жылдары өткен әлем чемпионатында өздерін мойындатты.

51 келі. Даниял Сәбит (дебют). 23 жастағы боксшы бұған дейін 2021 жылы Азия чемпионатына қатысып, күміс жүлде иеленген. Енді жаһандық додада өз мүмкіндігін алды. Даниял бірер ай бұрын ғана Семейдегі ел чемпионатында жеңімпаз болды.

54 келі. Сәкен Бибосынов (1 алтын, 1 қола). 28 жастағы тәжірибелі Сәкеннің Олимпиада мен әлем чемпионатындағы жетістіктері 51 келіде тіркелген еді. Енді ол жаңа салмақта бақ сынайды. Қазақстан чемпионатында қарсылас шақ келтірмеген отандасымыз төртінші рет әлемдік бәсекеде жұдырықтасады.

57 келі. Оразбек Асылқұлов (дебют). 27 жастағы отандасымыз бұған дейін 2024 жылы Азия чемпионатының финалына дейін жеткен. Қазақстан чемпионатында 60 келіде өнер көрсетіп, қола жүлдеге ие болды.

60 келі. Серік Теміржанов (1 күміс). 27 жастағы Серік 2021 жылы көпшілікті таңғалдырып, әлем чемпионатының финалына дейін жетті. Ол өз мансабында үшінші рет әлемдік аламанда жұдырықтасады. Семейдегі Қазақстан чемпионатында осы салмақтың үздігі екендігін дәлелдеді.

63.5 келі. Ертуған Зейнуллинов (Әлем чемпионатының ширек финалисі). 28 жастағы Ертуған Ливерпульдегі додада ширек финалға дейін жетіп, жеңіске деген жігерлігін көрсете білді. Енді биыл өз көрсеткішін жаңартуға тырысады. Семейдегі Қазақстан чемпионатының финалисі.

67 келі. Санатәлі Төлтаев (Әлем чемпионатының ширек финалисі). 26 жастағы Cанатәлі үшінші мәрте жүлдегерлердің қатарына енуге тырысады. Әзірше оның ең үздік көрсеткіші 2021 жылы Сербияда тіркелген. Биылғы Қазақстан чемпионатында қарсылас шақ келтірмей, топ жарды.

71 келі. Абылайхан Жүсіпов (3 қола). 28 жастағы Абылайхан араға 4 жыл салып, қайта төртінші әлем чемпионатына барғалы жатыр. Ол бұған дейін 2017, 2019, 2021 жылдары қола жүлдені мойынына таққан еді. Енді сол көрсеткішін жаңартуға тырысады. Бұл салмақта 2023 жылы Асланбек Шымбергенов және 2025 жылы Төрехан Сабырхан күллі әлемді мойындатты. Семейдегі Қазақстан чемпионатында барлық қарсыластарынан бір бас жоғары болды.

75 келі. Сабыржан Аққалықов (Әлем чемпионатының қатысушысы). 23 жастағы Сабыржан Ливерпульдегі әлем чемпионатында бірінші айналымнан аса алмап еді. Алайда Семейдегі ел чемпионатында 75 келіде қайта өзін мойындатты.

81 келі. Ерасыл Жақпеков (дебют). 23 жастағы Ерасыл жақында ғана Семейдегі ел чемпионатында топ жарды. Бұған дейін 22 жасқа дейінгі Азия чемпионатында алтын медалін тағып, ересектер арасындағы Азия чемпионатында қола жүлдені еншілеген.

86 келі. Дәулет Төлемісов (дебют). 20 жастағы Дәулет Төлемісов сәуірде ғана Бразилиядағы әлем Кубогының кезеңінде сенсациялық алтын медальді иеленген. Енді әлем чемпионатында өз мүмкіндігін алды. Семей төрінде Қазақстан чемпионы атанды.

92 келі. Нурмагамед Юсупов (дебют). Ауыр салмақтағы сенім үнемі Айбек Оралбай мен Сағындық Тоғамбайға артылып келген еді. Енді 24 жастағы Нурмагамед өз күшін тексеріп көрмек. Семейдегі Қазақстан чемпионатында финалға дейін жетіп, Сағындыққа қарсы лайықты қарсылық көрсете білді.

+92 келі. Нұрлан Сапарбай (Әлем чемпионатының қатысушысы). 27 жастағы Нұрлан 2021 жылы Сербияда өнер көрсеткен. 4 жылдан кейін қайта қателігін түзеуге рұқсат алды. Отандасымыз кейінгі жылдары Қазақстан чемпионатында үздік шығып жүр.

Әлем чемпионатының қандай ерекшелігі бар? 

IBA ұйымы желтоқсандағы әлем чемпионатында бұрын-соңды болмаған қомақты 8 миллион АҚШ долларын тағайындады. Әр салмақ дәрежесінің жеңімпазы 300 000 АҚШ доллары, күміс жүлдегерге 150 000 АҚШ доллары, қола жүлдегерге 75 000 АҚШ доллары, бесінші орынға 10 000 АҚШ доллары табысталады. Сыйақының  50%-ы боксшыға, 25%-ы бапкерге, 25%-ы федерацияға беріледі.

Біздің серіктес: 200 000 фрибетті ұтысқа саламыз – арнаға жазыл және батырманы бас