WBO Жәнібек Әлімханұлын допинг үшін бір жылға шеттетті

Орта салмақтағы әлем чемпионы, қазақстандық боксшы Жәнібек Әлімханұлы бір жылға дисквалификацияланды. Бұл туралы Sport12.kz Boxingnews24 басылымына сілтеме жасап хабарлайды.

Шешімге 2025 жылдың қараша айында алынған допинг-сынама нәтижесі себеп болған. Сынамада тыйым салынған мельдоний заты анықталған. WBO-ның Чемпиондық жекпе-жектер жөніндегі комитеті бұл шешімді бірауыздан қабылдап, санкцияны 2025 жылдың 2 желтоқсанынан бастап күшіне енгізді.

Аталған датаға Жәнібектің кубалық боксшы Эрисланди Ларамен жоспарланған біріктіру жекпе-жегі белгіленген еді. Бұл кездесу орта салмақтағы күштердің ара-жігін айқындауы тиіс болатын. Алайда оң нәтиже көрсеткен талдауды Voluntary Anti-Doping Association (VADA) растады. Мельдоний – тыйым салынған заттар тізіміне енгізілген және бұған дейін де бірнеше спортшының шеттетілуіне себеп болған.

Дисквалификация мерзімі ішінде Әлімханұлына кез келген кәсіби немесе көрме жекпе-жектеріне қатысуға тыйым салынады. Осыған байланысты World Boxing Organization (WBO) дивизиондағы белсенділікті сақтау мақсатында уақытша әлем чемпионы атағы үшін жекпе-жек тағайындады. Онда рейтингтің бірінші нөмірі Дензел Бентли мен екінші нөмірі Энди Сааведра кездеседі.

Сондай-ақ 2026 жылдың желтоқсанында дисквалификация мерзімі аяқталғаннан кейін Жәнібек уақытша чемпионмен міндетті жекпе-жек өткізуге тиіс. Осы талап орындалмаған жағдайда қосымша санкциялар қолданылуы мүмкін.

Шеттетуге дейін Жәнібек Әлімханұлы орта салмақтағы ең үстем чемпиондардың бірі саналып келген еді. Оның Ларамен ықтимал айқасы дивизиондағы басты жекпе-жектердің бірі ретінде қарастырылған. Алайда дисквалификация салдарынан салмақтағы жағдай өзгеріп, чемпиондық бәсекеде жаңа үміткерлерге жол ашылды

Біздің серіктес: «Ойна, болжа, қатыс!»