Шымкентте бокстан халықаралық турнир өтеді

Ертең, 29 қыркүйекте Шымкентте Кеңес Одағының батыры Қарақозы Әбдалиевті еске алуға арналған ерлер арасында халықаралық турнир басталады. Жарыс 5 қазанға дейін жалғасады. 

Жарысқа Қазақстанның барлық аймағынан және бірнеше елден жүзден аса боксшы қатысады деп күтілуде.

Осымен 43ші рет өтетін беделді бәсекенің Қазақстан боксшылары үшін биыл орны бөлек болмақ. Себебі, дәл осы шаршы алаңда қараша айында Иорданияда өтетін Азия чемпионатына құрам іріктеледі.

Жарысқа кез келген аймақтан, кез келген боксшы қатыса алады. Яғни, бұл – Ашық турнир. 18 жастан асқан спортшылар ұйымдастыру комитетіне өтініш жолдауы тиіс. 

Турнирге Қазақстанның үздік боксшылары және Украина, Түркия, Өзбекстан, Тәжікстан, Қырғызстан командалары қатысады деп күтілуде.