Елдос Сайдалин қазақстандық боксшылардың жетістігіне не әсер еткенін айтты 

Бокстан Қазақстан құрамасының бас бапкері Елдос Сайдалин Сербияның Ниш қаласында өткен әлем чемпионатын қорытындылады.

Дүбірлі додада қазақстандық спортшылар 3 алтын, 2 күміс, 1 қола медаль алды. 

Ел құрамасынан Назым Қызайбай (48 келі), Алуа Балқыбекова (50 келі) және Аида Әбікеева (63 келі) чемпион атанды.

Финалда қарсыластарына есе жіберген Виктория Графеева (60 келі) мен Елдана Тәліпова (81 келіден жоғары) күміс жүлдені қанағат тұтты.

Сондай-ақ ел құрамасынан Наталья Богданова (70 келі) қола жүлдегер болды.

- Барша Қазақ еліне қыздарды алғашқы күннен қолдап жатқанынан ризашылығымды білдіргім келеді. Бұл жеңіс - бәрімізге ортақ. Әнұранымыз үш мәрте шырқалып, көк туымыз желбіреді. Назым әлемнің үш дүркін чемпионы атанды. Осы орайда барлық бапкерлерді, дәрігерлерді және басқа да мамандарды жеңіспен құттықтаймын. Ауызбірліктің арқасында осындай табысқа жеттік, - деді ол.