Назым Қызайбай: 15 жасымда айлығымды жинап, әпкемнің құдалығын өткізіп бердім

Бокстан үш дүркін әлем чемпионы Назым Қызайбай алғашқы табысын отбасы игілігіне жұмсағаны туралы айтып берді.

Бұл туралы ол Qazaqstan ұлттық телеарнасы эфиріндегі «1001 Түн» бағдарламасында сөз қозғады.

— Бала кезімнен әрқашан отбасыма көмектескім келетін. 15 жасымда құрамаға қосылып айлық ала бастадым, сол кезден қаражат жинай бердім. Бір күні Қостанай қаласында жарыста жүргенімде, әпкемді алып қашып кетті деген хабар келді. Шыны керек бұл жаңалықты естігенде, қатты қуандым. Себебі жездемді ата-анамыз танымаса да, мен жақсы білуші едім. Біз Жетіген ауылында бірге тұратынбыз, сондықтан оған сенімім мол еді. Сол кезде жиған-терген бар ақшамды ата-анама беріп, құдалық жасауға және әпкемнің артынан апаратын жасауын алуға көмектестім,– деді Назым Қызайбай.

Еске салсақ, 31 жасар Назым Қызайбай жақында Сербияның Ниш қаласында өткен әлем біріншілігінде топ жарып, үш дүркін чемпион атанған еді.