Бокстан Бекзат Саттархановты еске алуға арналған халықаралық турнир басталды

Түркістан қаласындағы Olympic Center спорт кешенінде бокстан 2000 жылғы Сидней Олимпиадасының жеңімпазы, «Барыс» орденінің тұңғыш иегері, түркістандық талантты боксшы Бекзат Саттархановты еске алуға арналған 2007-2008 жылы туылған жастар арасындағы халықаралық турнир басталды, — деп жазады Sport12.kz

Биыл ХХІII рет өтіп жатқан халықаралық бокс додасына Ресей, Өзбекстан, Қырғызстан, Моңғолия, Тәжікстан, Әзірбайжан, Қытай, Египед, Сауд Арабия, Кувейт елдерімен қатар Қазақстанның барлық аймағынан іріктелген былғары қолғап шеберлері келген.

Түркістан төріндегі шаршы алаңға талантты боксшылар шығып, тартысты жекпе-жектер өткізуде. Биылғы бұл халықаралық бокс бәсекесінде ұлдар 13 салмақ бойынша жұдырықтасса қыздар 6 салмақ дәрежесінде жеңімпаздарды анықтайды. Айта кетейік, IBA талаптарына сай өтіп жатқан бұл халықаралық бокс додасында жеңімпаз атанған спортшыларға спорт шебері атағы беріледі.

Түркістан облысының әкімдігі мен облыстық дене шынықтыру және спорт басқармасы жоғары деңгейде ұйымдастырған бұл халықаралық бокс додасына жалпы 30 команда, 300-ге жуық боксшы қатысуда. Түркістан облысының жігіттер құрамасы толық құрамда өңір намысын қорғаса, қыздар құрамасы 4 салмақ дәрежесінде ринг төріне көтерілетін болады.

20 жасында жасындай жарқылдап, Сидней олимпиадасының шыңын бағындырған Бекзат Саттархановтың анасы Сырлыкүл Саттарханова да батыр ұлын еске алуға арналған турнирге арнайы келіпті. Дәстүрлі бокс турнирі жыл сайын қаншама талантты жастың шеберлігін шыңдауда. Бокс бәсекесінің жеңімпаздары 4-сәуір күні анықталады.