Жәнібек Әлімханұлының қатысуымен баспасөз жиыны өтеді

2 сәуір күні «Rixos President Astana» қонақүйінде IBF және WBO нұсқалары бойынша орта салмақтағы әлем чемпионы Жәнібек Әлімханұлы (16-0, 11 KO) мен оның қарсыласы – Франциядан келген Анауэль Нгамиссингенің (14-0, 9 KO) қатысуымен баспасөз жиыны өтеді.

          Бұл шара еліміздің және шетелдің үздік спортшылары қатысатын тарихи бокс кешіне дайындық аясында ұйымдастырылады.

          Баспасөз жиынына «Nomad Promotions» компаниясының құрылтайшысы Рүстам Қуаншалиев, Қазақстан кәсіпқой бокс федерациясының президенті Рахымжан Ердінбеков, кеште өнер көрсететін боксшылар: Махмұд және Төрехан Сабырхан, Батыр Жүкембаев, Баходир Жалолов (Өзбекстан), Азинга Фузиле (ОАР), Сұлтан Заурбек және олардың промоутерлері мен менеджерлері қатысады.

       Қазақстандық боксшы Жәнібек Әлімханұлы мен франциялық Анауэль Нгамиссенгенің арасындағы титулдық жекпе-жек 5 сәуір күні «Барыс-Аренада» (Астана) өтеді. Жекпе-жекте WBO және IBF тұжырымдары бойынша орта салмақтағы чемпиондық белбеулер сарапқа салынады. Кездесуді Qazaqstan және Qazsport телеарналары тікелей эфирде ұсынады. Сондай-ақ, кешті ESPN+ платформасынан да тамашалауға болады.