Әлем кубогы: Үшінші жарыс күні ел қоржыны қола жүлдемен толықты

Бүгін, 4 сәуірде World Boxing ұйымы аясындағы Бразилияның Фос-ду-Игуасу өтіп жатқан Әлем кубогының үшінші жарыс күні мәресіне жетті.

Бұл күні еліміздің намысын қорғаған жалғыз спортшы Даниял Сапарбай турнирдің қола жүлдегері атанды.

+90 келі салмақ дәрежесінде күш сынаған ол жартылай финалда жастар арасындағы Әлем чемпионы (2021), 21 жасқа дейінгі санатта екі дүркін Азия чемпионы (2022, 2023) өзбекстандық Жахонгир Зокировқа жол берді.

Үш раундтың қорытындысы бойынша төрешілер бірауыздан (0:5) өзбек боксшысын жеңімпаз деп таныды.

Осылайша Даниял қола жүлдеге ие болды. Боксшымыз бұған дейін жарыстың ширек финалда үндістандық Нарендер Нарендерден 3:2 есебімен басым түскен еді.

Айта кетейік, 19 елден 130 боксшы сынға түсіп жатқан дүбірлі дода 5 сәуірге дейін жалғасады.