Төрехан Сабырхан кәсіпқой бокстағы алғашқы жекпе-жегін сәтті өткізді

Астана қаласындағы «Барыс Арена» мұз сарайында отандық және шетелдік бокс жұлдыздарының қатысуымен бокс кешінде қазақстандық Төрехан Сабырхан кәсіпқой бокстағы алғашқы жекпе-жегін өткізді.

Жартылай орта салмақтағы жекпе-жек (69,9 келі) бойынша ол чехиялық Йиржи Хаукемен қолғап түйістірді. Жекпе-жек алты раундқа жоспарланды. 

Кәсіпқой бокста алғаш рет жекпе-жекке шыққанымен Төрехан бірінші раундта сенімді ойын көрсетті. Жылдам соққы жұмсауға көңіл бөлді. 

Үшінші раундта Төрехан қарсыласына жойқын соққы жұмсап, қарсыласын нокдаунға жіберді.

Осылайша ол кәсіпқой бокстағы алғашқы жекпе-жегін сәтті өткізді.

19-жастағы Төрехан Сабырхан 2023 жылғы әлем чемпионы Махмуд Сабырханның туған інісі. Бұдан бұрын жастар және жасөспірімдер арасында әлем және Азия чемпионатында жоғары табысқа жеткен ол биыл Болгарияда өткен «Странджа кубогында» жеңіс тұғырынан көрінді.