Астанадағы бокс кеші: Өзбекстандық нокаутшы жарқын жеңіске жетті

Бүгін Астана қаласындағы «Барыс Арена» спорт кешенінде халықаралық деңгейдегі ауқымды «Battle of the Brave» бокс кеші өтуде.

Аталған кеш аясында 57 келі салмақ дәрежесінде өзбекстандық Отабек Холматов (12-1, 11 KO) тәжірибелі филиппиндік боксшы Джейсон Кано Манигосқа (30-12-2, 20 KO) қарсы шаршы алаңға шықты.

8 раундқа жоспарланған жекпе-жекте Холматов қарсыласын толығымен өз бақылауында ұстады. Ол бірінші раундтан бастап белсенділік танытып, қарсыласын бірнеше мәрте нокдаунға түсірді. Өзінің бойы мен қолының ұзындығын тиімді пайдалана білген Отабектің рингтегі үстемдігі айқын көрінді.

Холматов жекпе-жек барысында қарқынын бәсеңдетпей, қарсыласын жан-жақты қыспаққа алды. Үшінші раундтан кейін-ақ Манигостың едәуір шаршай бастағаны байқалды. Ал алтыншы раундта Отабек кезекті комбинациясымен филиппиндік боксшыны тағы да нокдаунға түсірді.

Төреші жекпе-жекті жалғастыруға мүмкіндік бергенімен, соңғы раундта бәрі шешілді. Холматов жойқын соққылар сериясымен қарсыласын тізе бүктіруге мәжбүр етті. Осылайша, техникалық нокаут тіркеліп, өзбекстандық боксшы айқын жеңіске жетті.

Айта кетейік, кештің басты жекпе-жегінде Жәнібек Әлімханұлы (16-0, 11 КО) франциялық Анауэль Нгамиссенгемен (14-0, 9 КО) жұдырықтасады.