Астанадағы бокс кеші: Балауса Мұздыман жеңісті сериясын жалғастырды

Бүгін Астана қаласындағы «Барыс Арена» спорт кешенінде халықаралық деңгейдегі ауқымды «Battle of the Brave» бокс кеші өтуде.

Әйелдер арасындағы жеңіл салмақта (57,5 келі) қазақстандық боксшы Балауса Мұздыман (6-0, 5КО) Филиппин өкілі Мария Тереза Пинилимен (7-1, 2КО) шаршы алаңға шықты. Қос боксшы арасындағы кездесу 2 минуттан тұратын 8 раундқа жоспарланды.

Жекпе-жек барысында Балауса өз күшін, дәлдігі мен рингте ұтқыр қозғалуын жоғары деңгейде көрсетіп, қарсыласынан басым түсті. Мария Тереза да лайықты қарсылық көрсеткенімен, Балауса әрбір раундта сенімді қимылдап, жеңіске жете білді.

Төрешілердің бірауыздан берген шешімі бойынша, Балауса Мұздыман кәсіби мансабындағы жетінші жеңісіне қол жеткізіп, нәтижелі сериясын сақтап қалды.

Айта кетейік, кештің басты жекпе-жегінде Жәнібек Әлімханұлы (16-0, 11 КО) франциялық Анауэль Нгамиссенгемен (14-0, 9 КО) жұдырықтасады.