19 сағат бұрын
Астанадағы бокс кеші: Сұлтан Заурбек тартысты жекпе-жекте жеңіске жетті

Бүгін Астана қаласындағы «Барыс Арена» спорт кешенінде халықаралық деңгейдегі ауқымды «Battle of the Brave» бокс кеші өтіп жатыр.
IBF Intercontinental белбеуі сарапқа салынған 58,9 келі салмақта өткен жекпе-жекте қазақстандық боксшы Сұлтан Заурбек (19-0, 13 КО) оңтүстік африкалық Азинга Фузилеге (18-2, 12 КО) қарсы шаршы алаңға шықты. Жекпе-жек 10 раундқа жоспарланған болатын.
Қос боксшы арасындағы кездесу таза әрі тартысты өтті. Былғары қолғап шеберлері клинчке жиі бармай, жанкүйерлерге сапалы әрі әсерлі бокс көрсетті. Жекпе-жек тең дәрежеде өрбігенімен, чемпиондық раундтарда Сұлтан қарқынын үдетіп, сериялы соққыларын дәл дарыта білді. Нәтижесінде, төрешілердің бірауыздан шығарған шешімі бойынша Сұлтан Заурбек жеңіске жетті.
Айта кетейік, кештің басты жекпе-жегінде қазақстандық Жәнібек Әлімханұлы (16-0, 11 КО) франциялық Анауэль Нгамиссенгемен (14-0, 9 КО) қолғап түйістіреді.
