Жәнібек Әлімханұлы келесі қарсыласын таңдады

Орта салмақта WBO және IBF тұжырымдары бойынша әлем чемпионы Жәнібек Әлімханұлы WBC чемпионы, доминикандық Карлос Адамеспен жекпе-жек өткізгісі келетінін мәлімдеді. Бұл туралы Sport12.kz хабарлайды.

«Қазақ стилі» лақап атымен танымал боксшы бұл ойын өз командасына жеткізгенін айтты.

«Маған үшінші титул керек! Қазір мені басқа ешқандай жекпе-жек қызықтырмайды. Тек үшінші белбеу үшін өтетін айқас керек!

Карлос Адамес, мен менеджеріме сенімен ғана жекпе-жекке шығатынымды айттым. Енді кезек сенде. Өзіңнің командаңмен сөйлесіп, бұл жекпе-жекті жүзеге асырайық. Ешқандай сылтау болмасын, ешқандай кешігуге жол жоқ. Жанкүйерлерге қалағандарын сыйлайық!» — деп жазды Жәнібек Әлімханұлы әлеуметтік желідегі парақшасында.

Еске салайық, 5 сәуір күні Астанада өткен кеште Жәнібек франциялық Анауэль Нгамиссенгені бесінші раундта нокаутқа түсіріп, WBO және IBF чемпиондық белбеулерін сәтті қорғаған болатын.