Ресейдегі турнирде Мұхамедсабыр Базарбайұлы қола алды

Ресейдің Хабаровск қаласында өтіп жатқан бокстан Константин Коротковты еске алуға турнирінде Мұхамедсабыр Базарбайұлы қола жүлдені қанағат тұтты.

Ол 67 келі салмақта жартылай финалда ресейлік Егор Козорезовке 0:5 есебімен жеңіліп, турнирдің қола медалін қанағат тұтты.  

Бүгін Сәкен Бибосынов (54 келі )өзбекстандық Фариезбек Дусматовты 5:0 есебімен қапы қалдырып, финалға шықты.

Қазірге дейін ел құрамасынан Римма Волосенко (60 келі) өзбекстандық Рашида Тагированы 5:0, Ұлдана Таубай (66 келі) тағы бір қазақстандық Аружан Жаңабаеваны 4:1 есебімен жеңіп, бас жүлдені сарапқа салуға мүмкіндік алды.  

Жарыстың аталған сатысында Жандос Қыдыралиев (63.5 келі) өзбекстандық Абдулло Мадаминовқа 0:5 есебімен жол беріп қойды.  

Айта кетейік, халықаралық турнир биыл он алтыншы рет ұйымдастырылып отыр. Байрақты бәсеке 20 сәуірге дейін жалғасады.