Садриддин Ахмедов cалмақ өлшеу рәсімінен өтті

Кәсіпқой бокстан бірінші орта салмақ өкілі Садриддин Ахмедов (15-0, 13 KO) 20 сәуір күні АҚШ-тың Калифорния штатындағы Коммерс қаласында өтетін Hollywood Fight Nights бокс кешінің басты жекпе-жегіне шығады, деп хабарлайды Sport12.kz.

Ахмедовтің қарсыласы – мексикалық тәжірибелі боксшы Элиас Эспадас (23-6, 16 KO). Бүгін айқас алдындағы салмақ өлшеу рәсімі сәтті өтті. Екі боксшы да 156,4 фунт (шамамен 70,94 келі) салмақ көрсеткен. Бұл көрсеткіш дивизионның ресми лимиті — 154 фунттан (69,85 кг) сәл артық. Алайда титулдық емес жекпе-жектерде мұндай ауытқуға рұқсат етіледі.

Салмақ өлшеу рәсімінен кейін қос боксшы дәстүрлі «көз арбасу» рәсімін өткізіп, шаршы алаңдағы теке-тіреске тас-түйін дайын екенін байқатты.