Коротков турнирі: Қазақстан әйелдер құрамасы алтынсыз қалды

Ресейдің Хабаровск қаласында өткен Константин Коротковты еске алу турнирінде Қазақстан әйелдер құрамасы үш күміс және екі қола медальмен шектелді.

Бүгін шаршы алаңға шыққан үш боксшымыз да финалда қарсыластарына жол беріп, алтын жүлдеге қол жеткізе алмады. 57 келіде бақ сынаған Айдана Забынбекова Солтүстік Кореяның өкілі Сок Хен Куға 0:5 есебімен есе жіберсе, 60 келідегі Римма Волосенко ресейлік Ирина Автинаға төрешілердің екіге бөлінген шешімімен (2:3) жол берді. Ал 66 келі салмақта жұдырықтасқан Ұлдана Таубай тағы бір солтүстіккореялық боксшы Су Хе Хоангқа 0:5 есебімен ұтылды.

Бұған дейін жартылай финалда жеңілген Гүлнар Тұрапбай (50 келі) мен Аружан Жаңабаева (66 келі) турнирді қола жүлдемен аяқтаған болатын.

Осылайша, Қазақстан әйелдер құрамасы 16-рет ұйымдастырылған беделді турнирді 3 күміс пен 2 қола медальмен қорытындылады.