Геннадий Головкиннің алғашқы бапкері қайтыс болды

Бокстан бұрынғы Әлем чемпионы, Қазақстан Ұлттық Олимпиадалық комитетінің басшысы Геннадий Головкиннің алғашқы бапкері Виктор Дмитриев 71 жасында өмірден озды, деп хабарлайды Sport12.kz.

Виктор Дмитриев 1953 жылдың 26 шілдесінде дүниеге келген. Ғұмырының 40 жылға жуық уақытын шәкірт тәрбиелеуге арнаған. Қазақстан Республикасының еңбек сіңірген бапкері 10-нан аса спорт шебері мен 20-ға жуық спорт шебері атағына үміткерге тәлімгерлік еткен. Шәкірттерінің арасында бокстан бұрынғы Әлем чемпионы, Олимпиада ойындарының күміс жүлдегері Геннадий Головкин (42-2-1, 37 КО) бар.

Головкин алғашқы бапкерінің қазасына байланысты көңіл айтты:

– Қазақстан Республикасы Ұлттық Олимпидалық комитеті ұжымының атынан және жеке өз атымнан орны толмас ауыр қайғыға байланысты шын жүректен көңіл айтамын. Бұл – бүкіл спорт қауымдастығы үшін ғана емес, оның шәкірті ретінде мен үшін де ауыр қаза. Виктор Константинович тек үздік жаттықтырушы ғана емес, нағыз тәлімгер, ұстаз, үлгі болатын жан еді. Оның спортқа деген адалдығы, кәсібилігі және әрбір спортшыға ерекше көзқараспен қарай білуі біздің жадымызда мәңгі сақталады. Ол Қазақстандағы бокстың дамуына өлшеусіз үлес қосып, тұтас бір дарынды спортшылар буынын тәрбиелеп шығарды. Орын толмас ауыр қазаға байланысты шын жүректен көңіл айтамын. Оның жарқын бейнесі жүрегімізде мәңгі сақталады, – деді Геннадий Головкин.