Жәнібек Әлімханұлын жекпе-жекке шақырды

Орта салмақта WBO рейтингінің бірінші сатысында тұрған британдық боксшы Дензел Бентли (21-3-1, 17 KO) WBO және IBF тұжырымдары бойынша әлем чемпионы, қазақстандық Жәнібек Әлімханұлымен (17-0, 12 KO) реванш өткізгісі келетінін мәлімдеді, деп хабарлайды Sport12.kz

Еске салайық, 2022 жылдың қарашасында Бентли мен Әлімханұлы жекпе-жек өткізген еді. Ол кездесуде төрешілердің бір ауыздан шығарған шешімімен Жәнібек жеңіске жеткен болатын. Содан бері Бентли бірнеше рет қайта жұдырықтасуға ниетті екенін білдіріп келген. Енді ол нақты ұсыныс айтып отыр. Реваншты 19 шілде күні Лондонда, әйгілі «Уэмбли» стадионында өтетін Александр Усик пен Даниэль Дюбуа арасындағы екінші жекпе-жек аясында ұйымдастыруды қалайды.

— Ендігі шешім WBO ұйымына байланысты. Олар мені міндетті қарсылас ретінде бекітсе немесе Queensberry промоутерлік компаниясы Жәнібекпен келіссөз жүргізсе, ол жекпе-жекке тыңғылықты дайындалып үлгеретін еді. Өйткені ол жай ғана чемпион емес, бірнеше белбеуді біріктірген әлем чемпионы. Сондықтан келіссөзді қазірден бастау қажет, — деді Бентли.

Сондай-ақ британ боксшысы қазақстандық қарсыласының жақсы формада екенін атап өтті:

— Ол сәуірде жекпе-жек өткізді. Демек, ұзақ үзіліс алған жоқ. Меніңше, ең үлкен қиындығы – салмақ қуу болған. Сол туралы естідім. Бірақ жалпы алғанда, ол жақсы жұдырықтасты.