Бек Нұрмағанбеттің АҚШ-тағы келесі қарсыласы белгілі болды

Орта салмақта өнер көрсететін қазақстандық боксшы Бек Нұрмағанбет (14-0, 12 KO) 24 мамыр күні АҚШ-тың Калифорния штатындағы Сан-Диего қаласында рингке қайта оралады, деп хабарлайды Sport12.kz

Оның қарсыласы — Гондурас елінің өкілі Карлос Фидель Гуити Миранда (7-2, 3 KO). Жекпе-жек сегіз раундқа жоспарланған. Қазақстан уақыты бойынша жекпе-жек 25 мамыр таңертең өтеді.

Бек Нұрмағанбет бұған дейін 5 сәуір күні Пенсильвания штатындағы Филадельфия қаласында жұдырықтасып, коста-рикалық Энкарнасьон Диасты (20-6, 11 KO) алғашқы раундта нокаутпен жеңген болатын.

Айта кету керек, Бек АҚШ-та екінші орта салмақтағы абсолютті әлем чемпионы, мексикалық Сауль «Канело» Альвареспен бірге жаттығып жүр.