Бүгін ҚПЛ-ның 11-тур матчтары басталады

Бүгін футболдан Премьер-лига командалары арасындағы ел біріншілігінің 11-туры басталады, деп хабарлайды Sport12.kz.

Аталған тур 30 және 31 мамыр күндері өтеді. Бүгін 4 ойын болса, сенбіге 3 кездесу белгіленген.

Бүгін сағат 18:00-де «Жеңіс» (Астана) пен «Ордабасы» (Шымкент), «Елімай» (Семей) мен «Астана» турдың алғашқы ойындарын өткізеді. Одан кейін 18:30-дa «Тобыл» (Қостанай) мен «Атырау», 20:00-де «Ақтөбе» мен «Қайрат» (Алматы) шеберлік байқасады.

Ал 31 мамырда 16:00-де «Ұлытау» (Жезқазған) мен «Тұран» (Түркістан), «Оқжетпес» (Көкшетау) мен «Қызылжар» (Петропавл), 20:00-де «Қайсар» (Қызылорда) мен «Жетісу» (Талдықорған) ойнайды.

Айта кетсек, қазірге дейін көш басында 25 ұпаймен «Ақтөбе» келеді. Одан кейінгі орындардағы «Астананың» 24, «Қайраттың» 21 ұпайы бар.

Сұрмергендер көшінде Дастан Сәтпаев («Қайрат») 7 голмен көш басында тұрса, одан кейін Марин Томасов («Астана»), Дәурен Жұмат («Оқжетпес») және Айбар Жақсылықов («Қайсар») 6 гол соғып үлгерді.