Алматылық «Қайрат» бразилиялық шабуылшымен келісімшартқа отырды

Алматылық «Қайрат» футбол клубы бразилиялық шабуылшы Эдмилсонмен келісімшартқа қол қойды, деп хабарлайды Sport12.kz.

Клубтың баспасөз қызметінің мәліметінше қос тарап 2027 жылдың маусымына дейін жарамды жаңа келісімшартқа отырған.

Эдмилсон де Паула Сантос Фильо Сан-Паулу штатында дүниеге келген. Ол футболдағы алғашқы қадамын «Вело Клубта» жасады. 2019 жылдан 2023 жылға дейін Португалияда «Марко 09» және «Вилаверденсе» клубтарында ойнаған.

Соңғы екі жылда ол словениялық «Целе» клубының намысын қорғап, чемпион болып, Ел кубогының иегері атанды. УЕФА Конференция лигасының соңғы маусымында Эдмилсон командасымен бірге барлық 12 матчта ойнап, турнирдің ширек финалына дейін жетті.

28 жастағы бразилиялық шабуылшы «Целе» сапында жалпы 73 матч өткізіп, 19 гол соғып, 8 нәтижелі пас берген.