Еурокубок жеребесінің уақыты белгілі болды

Келесі аптада қазақстандық футбол клубтарының 2025/26 жылғы еурокубоктық маусымдағы алғашқы қарсыластары анықталады, деп хабарлайды Sport12.kz

17 маусымда Чемпиондар лигасы, Еуропа лигасы және Конференциялар лигасының бірінші іріктеу кезеңінің жеребесі өтеді.

Жаңа маусымда Чемпиондар лигасында Қазақстан атынан «Қайрат» өнер көрсетеді. Алматылық клуб алғашқы ойынын 8 немесе 9 шілдеде, ал қарымта матчын 15 немесе 16 шілдеде өткізеді.

«Актобе» Еуропа лигасында бақ сынайды. Бұл команда 10 және 17 шілдеде алғашқы іріктеу кезеңінің екі кездесуін өткізеді.

Конференциялар лигасының бірінші кезеңінен «Ордабасы» бастайды. Шымкенттік команда да өз ойындарын 10 және 17 шілдеде өткізеді.

Ал «Астана» Конференциялар лигасының екінші іріктеу кезеңінен бастайды. Астана клубының қарсыласы 18 маусымда анықталады. Матчтар 24 және 31 шілдеде өтеді.