Криштиану Роналду «Әл-Наср» клубында қанша уақытқа қалатыны белгілі болды

Португалияның әйгілі шабуылшысы Криштиану Роналду Сауд Арабиясының «Әл-Наср» клубында өнерін жалғастырады, деп жазды Sport12.kz

Фабрицио Романоның мәліметінше, 40 жастағы футболшы командамен жаңа келісімшартқа отыруға дайын. Қазір тараптар келісімнің соңғы тұстарын талқылап жатыр. Жаңа келісім бір немесе екі жылға жасалуы мүмкін. Сонымен қатар, Роналду қаласа, 2027 жылдың маусымына дейін клуб сапында ойнай алады.

Айта кетейік, өткен маусымда «Әл-Наср» бірде-бір трофей алмады. Сауд Арабиясы чемпионатында команда 70 ұпаймен үшінші орынды иеленді.

Криштиану Роналду «Әл-Насрға» 2023 жылдың қаңтарында қосылған болатын. Соңғы маусымда ол барлық жарыстарда 35 гол соғып, 4 нәтижелі пас берген. Жас шамасына қарамастан, Роналду жоғары деңгейде ойын көрсетуін жалғастырып келеді.