Клубтық әлем чемпионатында ең көп жанкүйер жинаған клуб белгілі болды

АҚШ-та өтіп жатқан 2025 жылғы клубтық әлем чемпионатында Мадридтің «Реалы» жанкүйер саны жағынан көш бастады, деп хабарлайды Sport12.kz

«Реалдың» орташа көрермен саны — 67 247 адам, бұл турнирдің басқа матчтарындағы орташа көрсеткіштен (шамамен 37 000) екі есеге жуық жоғары.

Топтық кезеңде Мадридтің «Реалы» Мексиканың «Пачука» клубымен кездесіп, 3:1 есебімен жеңіске жетті. Бұл ойынды Шарлотт қаласындағы «Банк оф Америка» стадионында 70 248 жанкүйер тамашалады.

Ал ширек финалда дортмундтық «Боруссияны» 3:2 есебімен тізе бүктірген кездесу Ист-Ратерфордтағы әйгілі «Метлайф» стадионында өтті. Бұл матчқа 76 611 көрермен жиналды. Айта кетейік, турнир аясында бұл аренаның орташа көрермен саны — 43 000 адам.

Мадридтік «Реал» енді жартылай финалда Францияның «Пари Сен-Жермен» клубымен күш сынасады. Кездесу 10 шілде күні, Астана уақытымен 00:00-де өтеді.