Видео шолу «ПСЖ» - «Реалды» 4:0 есебімен ұтып, финалға шықты

АҚШ-тың Нью-Джерси штатындағы Ист-Ратерфорд қаласында орналасқан «Метлайф» стадионында клубтық әлем чемпионаты – 2025 жартылай финалында «ПСЖ» мен мадридтік «Реал» кездесті. Ойынның бас төрешісі польшалық Шимон Марциняк болды.

Франциялық команда қарсыласты ірі есеппен жеңіп, финалға жолдама алды – 4:0.

Матчтағы алғашқы голды «ПСЖ» жартылай қорғаушысы Фабиан Руис 6-минутта соқты. 9-минутта вингер Усман Дембеле есепті 2:0-ге жеткізді. 24-минутта Руис дубль авторы атанып, командасының басымдығын нығайтты. Ал ойынның 87-минутында алаңға алмастырылып шыққан шабуылшы Гонсалу Рамуш соңғы голды соғып, қорытынды есепті белгіледі.

Осылайша, «Реал» клубтық әлем чемпионатындағы жолын аяқтады. Ал «ПСЖ» финалға шығып, 13 шілде күні шешуші ойында «Челсиге» қарсы өнер көрсетеді.