Клубтық әлем чемпионаты – 2025 финалистері белгілі болды

АҚШ-та өтіп жатқан клубтық әлем чемпионаты – 2025 турнирінде финалда кімдер кездесетіні белгілі болды, – деп хабарлайды Sport12.kz.

Екінші жартылай финалда «ПСЖ» мадридтік «Реалды» 4:0 есебімен ірі жеңіске жетіп, шешуші ойынға жолдама алды. Матч Нью-Джерси штатындағы Ист-Ратерфорд қаласындағы әйгілі «Метлайф» стадионында өтті. Алғашқы голды 6-минутта Фабиан Руис соқты, араға үш минут салып Усман Дембеле есепті еселей түсті. Кейін Руис дубль авторы атанып, тағы бір гол енгізді. Ал 87-минутта Гонсалу Рамуш қорытынды есепті белгіледі.

Бұған дейінгі жартылай финалда ағылшындық «Челси» бразилиялық «Флуминенсені» 2:0 есебімен жеңіп, финалға бірінші болып шыққан еді.

Турнирдің жеңімпазы 13 шілде күні өтетін «Челси» мен «ПСЖ» арасындағы финалдық матчта анықталады. Ойын Нью-Джерсидегі «Метлайф» стадионында өтеді.