5 сағат бұрын
Рафаэль Уразбахтин «Қайраттың» «Қайсарды» неге жеңе алмағанын айтты
Фото: «Қайрат» футбол командасы
«Қайрат» футбол командасының бас бапкері Рафаэль Уразбахтин «Қайсармен» болған тең ойын жайлы айтты, деп хабарлайды Sport12.kz.
Оның айтуынша, алматылық клуб қарсыласпен кездесуде ұпай жоғалтуды жоспарлаған жоқ. Ойынға тыңғылықты дайындалған.
- Қызылордадағы алғашқы матчымызды толық талдап шықтық. Жоспарымыз бойынша бәрі жақсы жүріп жатқан. Жігіттер тырысты, тапсырмаларды орындады. Бірінші таймда жеткілікті мүмкіндік болды, өкінішке қарай, гол соға алмадық. 1:0 - қауіпті есеп. Қажетсіз қызыл қағаз алдық. Төреші не көргенін нақты білмеймін, оларға анық болар. Жігіттер аз құрамда ойнауға тырысты. Алаңға шыққандар шабуылды серпілтсін дедік. Өкінішке қарай, қарсылас тұтастай қорғанысқа жатып алды. Біз шешуші сәтті таба алмадық. Бұл үшін қарсыласқа лайықты баға беру керек.
Біз мүмкіндігімізді жүзеге асыруымыз керек еді. Соған қарамастан, жігіттерге алғыс айтқым келеді. Олар берілмеді, аз құрамда ойнаса да, басымдық көрсетті, бірақ оны іске асыра алмады. Бұл — футбол. Алға жылжимыз. Енді келесі матчқа дайындалу керек. Ертең таңертең ұшамыз. Басқа турнирге, басқа қарсыласқа назар аударамыз, - деді бас бапкер.
