Чемпиондар лигасы: «Қайрат» бүгін «КуПС» командасынан қарымта қайтара ала ма

Алматылық «Қайрат» футбол командасы UEFA Чемпиондар лигасы екінші іріктеу кезеңінде бүгін Финляндияның «КуПС» командасымен қарымта кездесу өткізеді, деп хабарлайды Sport12.kz. 

Кездесу бүгін қазақстандық уақытпен 20:00-де басталып, «Qazsport» телеарнасынан тікелей эфирде көрсетіледі. 

Алғашқы ойында алматылық клуб аталған қарсыласына 0:2 есебімен жол беріп қойды. 

«КуПС» командасы 1923 жылы құрылған. Өз елінде вейккауслигасында жеті мәрте чемпион атанды. Былтыр жеңіс тұғырына көтерлген олар биыл Чемпиондар лигасында бақ сынауға мүмкіндік алды.

Биыл Чемпиондар лигасы бірінші іріктеу кезеңінде олар Молдованың «Милсами» клубын екі ойынның нәтижесімен (0:0, 1:0) орта жолда қалдырды.

Еурокубок ойындарына тұрақты түрде қатысып келеді. 2021/22 жылғы маусымда Конференция лигасы плей-офф сатысына дейін жетті. Сол жылы үшінші іріктеу кезеңінде олар елордалық «Астананы» екі ойынның нәтижесімен (1:1, 3:4) қапы қалдырған еді.

Ал бірінші іріктеу кезеңінде алматылық команда екі ойынның нәтижесімен Словенияның «Qлимпиясын» (1:1, 2:0) есебімен жеңді.

Сондай-ақ еліміздің атынан «Астана» мен «Ақтөбе» Конференция лигасы екінші іріктеу кезеңіндегі қарымта ойындарын өткізеді.