Чехия құрамасының аңызы «Ақтөбе» туралы пікір білдірді

Чехия ұлттық құрамасының бұрынғы жартылай қорғаушысы, «Спарта» (Прага), донецкінің «Шахтері» мен «Яблонец» клубтарының экс-ойыншысы Томаш Хюбшман Конференциялар лигасының іріктеу кезеңіндегі «Ақтөбе» мен «Спарта» арасындағы кездесу жайлы пікір білдірді, деп хабарлайды Sport12.kz Sports24.kz порталына сілтеме жасап.

— Менің ойымша, «Ақтөбе» Прагада өте жақсы ойын көрсетті. Қайта матчтың алғашқы таймында қазақстандық команда сенімді қорғанып, «Спартаның» гол соғатын нақты сәттері өте аз болды, — деді чехиялық ардагер футболшы.

Сонымен қатар, ол келесі пікірін де қоса айтты:

— Үзілісте «Спарта» бір ойыншыны алмастырды. Ал екінші таймда матчтың бағытын өз пайдасына бұрып, келесі кезеңге өтті. Дегенмен, меніңше, «Ақтөбе» Еурокубокта ұятқа қалған жоқ. Олар мықты әрі сапалы қарсыласқа тап болды, — деп қорытындылады Хюбшман.