«Қайрат» және «Астана» еурокубоктыңүшінші іріктеу кезеңіндегі ойындарына төрешілер бекітілді

 Қазақстандық «Қайрат» және «Астана» командаларының UEFA Чемпиондар лигасы және Конференция лигасы плей-офф кезеңіндегі ойындарына кімдердің төрешілік жасайтыны белгілі болды, деп хабарлайды Sport12.kz.

Алматылық «Қайраттың» Чемпиондар лигасы үшінші іріктеу кезеңіндегі Словакияның «Слован» командасымен кездесуінде нидерландтық Сердара Гэзюбююк бастаған төрешілер бригадасы қызмет атқарады. Оған отандастары Эрвин Зейнстра мен Патрик Иниа көмектеседі. Төртінші төреші де сол елдің өкілі Янник ван дер Лаан.

Бұл ойын 6 тамыз күні Алматы қаласында өткізіледі. 

Айта кетсек, алматылық футболшылар бірінші және екінші іріктеу кезеңінде Словенияның «Олимпия» (1:1, 2:0), Финляндияның КуПС клубтарын (0:2, 3:0) жеңді. 

Ал Конференция лигасы үшінші іріктеу кезеңіндегі «Лозанна» (Швейцария) мен «Астана» кездесуіне польшалық Лукаш Кузьма бас төреші болып бекітілді. Көмекшілері - сол елдің өкілдері Якуб Винклер мен Петр Подбельски. Төртінші төреші міндетін тағы бір польшалық маман Дамиан Кос атқарады.

Алғашқы кездесу 7 тамызда қазақстандық уақытпен 23:15-те Швейцарияда болады.