Месси Аргентинадағы соңғы матчын өткізді

Лионель Месси, 38 жастағы аргентиналық шабуылшы, ұлттық құрамадағы соңғы ойынын өз елінде өткізуі мүмкін. Венесуэлаға қарсы 2026 жылғы әлем чемпионатының іріктеу матчында Месси дубль жасап, Аргентина 3:0 есебімен жеңіске жетті.

Ойыннан кейін Месси жанкүйерлерге алғысын айтып, толқып сөйледі:

«Көп жыл бойы әр ойынды бірге өткіздік, мен өте бақыттымын. Аргентинада жанкүйерлер алдында ойнау – мен үшін үлкен қуаныш. «Барселонада» мені жақсы көрді, дәл сондай махаббатты өз елімнен де сезіндім. Бұл – арманым еді», – деді ол.

Аргентина келесі матчта сырт алаңда Эквадормен кездеседі. Қалай болғанда да, команда қазірдің өзінде АҚШ, Канада және Мексикада өтетін 2026 жылғы әлем чемпионатына жолдама алды.

Месси мансабын ұлттық құрамада аяқтау туралы нақты шешім қабылдамағанын айтты:

«Әлі де ойнағым келеді. Әзірге шешім қабылдаған жоқпын, бәрін уақыт көрсетеді», – деді ол.

Айта кетейік, Венесуэлаға қарсы Буэнос-Айрестегі матч оның өз еліндегі соңғы іріктеу ойыны болғанын өзі де растады.

Біздің серіктес: 200 000 фрибетті ұтысқа саламыз – арнаға жазыл және батырманы бас