«Реал» жұлдызы сот алдында жауап беруі мүмкін

Мадридтік «Реалдың» шабуылшысы Винисиус Жуниор туған күнін айқай-шусыз атап өтпегені үшін қылмыстық жауапкершілікке тартылуы мүмкін, деп хабарлайды O Globo.

Футболшының туған күніне арналған үш күндік (19–21 шілде) кеш Рио-де-Жанейродағы жеке резиденциясында өткен. Оған шамамен 500 қонақ қатысыпты, арасында «Реал» ойыншылары, рэпер Трэвис Скотт және әнші Анитта да болған.

БАҚ мәліметінше, кеш барысында қатты музыка, фейерверктер және көршілердің тыныштығын бұзған өзге де әрекеттер тіркелген. Бір көршісі әскери полицияға шағымданған. Алғашқы ескертуден кейін де мереке жалғасқандықтан, көршілер Винисиусқа қарсы сотқа арыз берген.

Алдын ала тыңдау 6 қарашаға белгіленген. Футболшыға 15 күннен 3 айға дейін әкімшілік қамау немесе ірі көлемдегі айыппұл салынуы мүмкін.

Айта кетейік, бұған дейін Винисиус Жуниор нәсілшілдікке қатысты істе жәбірленуші тарап ретінде сот процесіне қатысқан болатын.

Біздің серіктес: 200 000 фрибетті ұтысқа саламыз – арнаға жазыл және батырманы бас