«Барселона» ерекше антирекорд тіркеді

Испанияның Ла Лигасындағы жексенбілік матчта «Барселона» өз алаңында «Реал Сосьедадтан» 1:2 есебімен жеңіліп қалды. Ханс-Дитер Флик баптайтын команда ойын бойы басымдық танытып, көптеп голдық мүмкіндік жасағанымен, нәтижеге әсер ете алмады.

Кездесу барысында «Барселона» бірнеше мәрте қарсылас қақпасын нысанаға алғанымен, доп бес рет қақпа қаңқасына тиген. Команда тек бір ғана мүмкіндігін голға айналдыра алды. Ал қонақтар аз сәтті барынша тиімді пайдаланып, екі гол соғып, үш ұпайды алып кетті.

Opta ұсынған дерекке сәйкес, «Барселона» 2006/07 маусымынан бері Еуропаның топ-5 чемпионаттарында бір матчта бес рет қақпа қаңқасына доп тигізіп, соған қарамастан жеңілген екінші команда атанды. Бұған дейін мұндай жағдай 2020 жылдың қыркүйегінде «Брайтон» мен «Манчестер Юнайтед» арасындағы ойында ғана тіркелген.

Статистикаға сүйенсек, «Барселона» бұл матчта алты айқын голдық мүмкіндікті пайдалана алмаған. Сонымен қатар каталониялық клубтың күтілетін гол көрсеткіші (xG) 4-ке жуық болған. Бұл көрсеткіш «Барселонаның» ойында айқын үстемдік еткенін аңғартады, алайда нәтиже таблосында бұл басымдық көрініс таппады.

Біздің серіктес: Бізге тіркел!