«Астананың» бас бапкері Григорий Бабаян ойын туралы айтты

«Астананың» бас бапкері Григорий Бабаян «Милсамимен» өткен кездесудің нәтижесі туралы айтты.

– Біз күткендей тартысқа толы матч болды. Алғашқы 20 минутта қарсылас қысым көрсетті, оған қоса ойыналды толқу да әсер етті. Артынша біз ойынды өз қолымызға алып, 75-минутқа дейін жақсы ойнадық, алға шықтық, тағы гол соқтық, бірақ офсайд болып, гол есептелмеді. Маған ойынның соңғы он минуты ұнамады, біз өте төмен ойнадық, қысым болғаны анық, есепті сақтап қалғымыз келді. Біз аяқдопшыларды ауыстыру арқылы ойынды өз қақпамыздан алыстатуға тырыстық. Бұл бастапқы бес минутта нәтижесін көрсетті, кейін олар кері шегініп, 90-минутта гол жіберіп алдық. Тең есеп көңіл көншітпейді, бірақ қарымта матч бар. Бізде уақыт бар, ойынға оңтайлы жағдайда дайындалу керек.

– Қарсыласыңыздың ойынына қандай баға берер едіңіз? 

– Еуропалық жарыстарда осал қарсылас жоқ. Бүгін тең қарсыластардың ойыны болды, бізде жүзеге асыратын мүмкіндіктер көбірек болды, не десек те «Милсами» өте лайықты қарсылас.