26.07.2024
«Тобыл» «Санкт-Галленге» қауқар көрсете алмады
Бүгін футболдан UEFA Конференция лигасының екінші іріктеу кезеңінде қазақстандық «Тобыл» сырт алаңда Швейцарияның «Санкт-Галлен» командасымен кездесті.
Алғашқы минуттан швейцариялық команда тізгінді қолға алуға тырысты. Дегенмен алғашқы голды қостанайлық команда соғып кетті.
Ойынның 28-минутында қостанайлық Игор Ивановичтің қақпаға бағыттаған добы «Санкт-Галлен» футболшысы Альберт Вальчидің аяғына тиіп, бағыты өзгерген доп қақпа торында тулап жатты. Швейцариялық футболшы автоголдың авторы атанды.
Одан кейін «Санкт-Галлен» сапынан Михайло Стеванович 35, Шадрак Аколо 39, Бастьен Тома 77, Альберт Вальчи 97-минутта мергендік танытты.
Осылайша «Тобыл» қарсыласынан 1:4 есебімен жеңіліп қалды.
Енді қарымта ойын 1 тамызда Қостанай қаласында өтеді.