Нұралы Әліп өзін қазақ тіліне қарсы деп жазғырған журналистке жауап берді

Қазақстандық футболшы Нұралы Әліп өзін қазақ тіліне қарсы деп пікірін білдірген азаматтарға жауап берді.

Ол ресейлік Владислав Радимов пен Андрей Аршавин қатысқан бейне сұхбатта Қазақстан ұлттық құрамасының бас бапкері Станислав Черчесов қатысқан баспасөз мәслихатында болған жағдайға байланысты ой-пікірін білдірген еді. Онда қазақстандық журналист Нұрсұлтан Құрманның қазақша қойған сауалына ресейлік бапкердің қайтарған жауабына байланысты әңгіме туындаған еді.

«Қолдауларыңызға үлкен рақмет, Қазақ елі! Соңғы айтқан сұхбатымды дұрыс емес қабылдаған кейбір жандарға айтқым келеді. Мен қазақ тіліне қарсымын немесе сөйлемеу керек деген жоқпын. Ондай ойым да болған жоқ. Мен өзім бір адамға (Нұрсұлтанға) келген қонаққа жайлылығыңды көрсетуің керек деп айтқанмын. Бірақ ол адам мені дұрыс түсінбей, басқа жағынан қазақ тіліне қарсы деп ойлап, өз пікірін айтып мені түсінбеді. Ұзын сөздің қысқасы, айтайын дегенім, мен өздерің сияқты, қазақтың қара домалақ баласымын. Қазақ елім үшін, жерім үшін жанымды беремін. Қазақты қазақ көтерер, біз - біргеміз, биік іргеміз», - деді Нұралы Әліп әлеуметтік желідегі парақшасында.