Қазақстан әлем чемпионатына бойкот жарияламайды

Бокстан Қазақстан ұлттық құрамасы 2023 жылғы әлем чемпионатына Ресей мен Беларусь спортшыларының қатысуына байланысты бойкот жариялауды жоспарлап отырған жоқ.

«Бокстан әлем чемпионаты алғаш рет Ташкентте өткелі жатыр. Әрине, бұл біздің бауырлас ел. Рингте біз бәсекелеспіз, бірақ рингтен тыс біз жақсы қарым-қатынастамыз. Бір жағынан мұндай чемпионатты қолдап, өткізу керек деп ойлаймын. Оның үстіне, Халықаралық Олимпиада комитеті тарапынан ешқандай шектеулер жоқ», - деп түсіндірді Қазақстан бокс федерациясының вице-президенті Әзиз Қожамбетов «Khabar Sport» YouTube арнасына берген сұхбатында.

Еске салайық, 20-ға жуық мемлекет Ресей мен Беларусь спортшыларының қатысуына байланысты әлем чемпионатына бойкот жариялаған болатын. Атап айтқанда, Ұлыбритания, АҚШ, Чехия, Польша, Ирландия, Канада, Швеция, Швейцария, Германия, Украина құрамалары турнирге қатысудан бас тартқанын мәлімдеді.