Туринде ХХХІІ Дүниежүзілік қысқы Универсиада басталады

2025 жылғы 13 қаңтарда Италияның Турин қаласында XXXII Дүниежүзілік қысқы универсиада басталып, 23 қаңтарға дейін жалғасады. Әлемнің 57 елінен 2000-ға жуық спортшы қатысатын бұл ірі студенттік бәсекеде 11 спорт түрінен 96 медаль жиынтығы сарапқа салынады. Биыл алғаш рет екі жаңа спорт түрі енгізілген: паратау шаңғысы және парашаңғы жарыстары.

Елімздің намысын 103 спортшы қорғамақ, олар ұлттық және жастар құрамаларының мүшелері. Қатысушыларды іріктеу жұмыстарын осы жылы ҚР Оқу-ағарту министрлігі «Ұлттық ғылыми-практикалық дене шынықтыру орталығы» РМҚК жүргізді.

FISU ережелеріне сәйкес, барлық қатысушылар 1 қаңтардағы жағдай бойынша кемінде 17 жаста және 25 жастан аспауы тиіс, сондай-ақ олар жарысатын елдің азаматтары болып, жоғары оқу орнында білім алуы шарт.

Айта кету керек, Қазақстан құрамасы өз тарихында ең жақсы нәтижені 2017 жылы Алматыда өткен Универсиадада көрсетіп, жалпы медаль есебі бойынша екінші орынға ие болған еді. Сол кезде қазақстандық спортшылар 36 медаль (11 алтын, 8 күміс және 17 қола) жеңіп алды. Универсиада-2017-де жеңімпаздар мен жүлдегерлер қатарында шаңғы жарысынан Иван Люфт, Ринат Мухин, Олжас Климин, Анна Шевченко, Ольга Мандрика, биатлоннан Галина Вишневская, Роман Еремин, фристайл могулдан Павел Колмаков,Юлия Галышева, шорт-тректен Денис Никиша, Анита Ногай, Ольга Тихонова, Мадина Жанбусинова және тағы басқа спортшылар бар. Олардың көбісі бүгінде еліміздің ұлттық құрамаларында көшбасшы атанып отыр.