Қазақстандық шабуылшы Анкудинов Испанияда клубын ауыстыруы мүмкін

Испанияның «Менсахеро» клубында ойнап жүрген 21 жастағы қазақстандық форвард Данил Анкудинов командасын ауыстыруы мүмкін.

– «Испания чемпионатының үшінші дивизионына ауысу мүмкіндігім бар. Бірақ қазіргі клубым мен үшін үлкен сома сұрап отыр, сондықтан келісімге келе алмай жатыр. Үшінші лигадағы клубтар ақша төлеуге дайын, бірақ аз сомаға. Сонымен қатар, келісімшартымның аяқталуына төрт ай қалды, сондықтан әзірге ешқандай жаңалық жоқ», – деді Анкудинов.

Анкудинов 2024 жылдың тамызында Беларусьтің «Днепр» клубынан «Менсахеро» сапына еркін агент ретінде қосылған. Қазіргі маусымда қазақстандық шабуылшы Испанияның Терсера Дивизион RFEF (испан футболының бесінші деңгейі) лигасында 15 матчқа қатысып, 3 гол соқты. Transfermarkt порталының мәліметі бойынша ойыншының құны 100 мың еуроны құрайды.