Бақтиер Зайнутдинов ойнайтын «Бешикташтың» жеңісіне үлес қосты

Қазақстандық футболшы Бақтиер Зайнутдинов ойнайтын «Бешикташ» командасы бүгін Еуропа лигасы жалпы кезеңінде испандық «Атлетик Бильбао» командасын өз алаңында қабылдады.

Бақтиер Зайнутдинов жасыл алаңға негізгі құрамда шыққан жоқ. Бас бапкер Уле Гуннар Сульшердің шешімімен ол қосалқы құрамда болды.

Кездесу басталған сәттен-ақ матчтың тартысты өтетіндігі белгілі болды. Кездесудің 17-минутында «Бешикташтың» ойыншысы Рафа Сильвадан пас алған Милот Рашица есепті ашты. Ал бірінші таймның соңында бильбаолық «Атлетик» ойыншысы Унаи Гомес есепті теңестірді. Осылайша бірінші тайм 1:1 есебімен аяқталды.

Екінші кезеңде 60-минутта тағы да бір мәрте мергендік танытқан Милот Рашица есепті ұлғайтты, 2-1. Ал 77-минутта бұған дейін екі мәрте нәтижелі паспен көзге түскен Рафа Силва өзі де мергендік танытты. Матчтың 90+2 минутында «Атлетик Бильбао» қақпасына белгіленген пенальтиден Жоау Мариу мүлт кеткен жоқ. 

Осылайша қарсыласын 4-1 есебімен тізе бүктірген «Бешикташ» жалпы турнир кестесінде тоғыз ұпаймен он бесінші орынға көтерілді. Әзірге олардың плей-офф сатысына шығуына мүмкіндігі бар.

Айта кетсек, бұл - норвегиялық маман Уле Гуннар Сульшердің түркиялық клуб тізгінін ұстағалы бергі тұсауксер ойыны.

Енді олар 30 қаңтарда сырт алаңда Нидерландтың «Твенте» командасымен шеберлік байқасады. Жеңіске жеткен жағдайда жарысты жалғастыра алады. 

Айта кетсек, 69-минутта «Бешикташ» ойыншысы Артюр Масуакудың орнына қазақстандық Бақтиер Зайнутдинов алаңға шықты. Ол командасының жеңісіне өз үлесін қоса білді.