«Қайсар» бір күнде екінші мәрте жеңіліп қалды

Қызылордалық «Қайсар» бүгін, 15 ақпанда екінші жолдастық кездесуін өзбекстандық «Насаф» командасына қарсы өткізді. 

Бұл команда өткен маусымда Өзбекстан чемпионатында жеңімпаз атанған еді. 

Алғашқы минуттан қызылордалық ұжымда Нұрымжан Салайдин, Абылайхан Төлегенов, Әділет Кеңесбек, Елжас Алтынбеков, Айбол Әбікен, Думан Нәрзілдаев, Нұрбол Ағзамбаев, Қуаныш Қалмұратов, Тимур Мұрзағалиев, Өркен Махан, Ерсұлтан Төреқұл жасыл алаңға шықты.

Қызылордалық команда сапынан Айбол Әбікен мен Думан Нәрзілдаев гол соқты.

Кездесуде «Қайсар» қарсыласына 2:4 есебімен жеңіліп қалды.

Еске салсақ, бүгін қызылордалық футболшылар Германияның «Меппен» командасына 1:2 есебімен есе жіберді.

Айта кетсек, биыл «Қайсар» командасы легионерлермен ойнаудан түбегейлі бас тартты.

Қазірге дейін қызылордалық ұжым қақпашы Нұрымжан Салайдин, қорғаушы Әділет Кеңесбек, Абылайхан Төлегенов, Қуаныш Қалмұратов, жартылай қорғаушы Думан Нәрзілдаев, Айбол Әбікен, шабуылшы Айбар Жақсылықовпен келісімшартқа отырды.