«Сарыарқаның» бұрынғы президентіне қандай бап бойынша іс қозғалды

Прокуратура органдарының бастама жасауымен Сыбайлас жемқорлыққа қарсы іс-қимыл агенттігі іздеу жариялаған Арғын Нығматулиннің үстінен қандай бап бойынша іс қозғалғаны мәлім болды.

Бұл туралы Kazinform ҚР Бас прокуратурасының баспасөз қызметіне сілтеме жасап хабарлайды.

«ҚР Бас прокуратурасы А.Нығматулинге және басқа да күдікті тұлғаларға қатысты Қылмыстық кодекстің 189-бабы (Сенiп тапсырылған бөтен мүлiктi иемденiп алу немесе талан-таражға салу) 4-бөлігі 2-тармағы бойынша тергеу жүргізіп жатыр», - делінген хабарламада.

Бұл бап бойынша, жеті жылдан он екі жылға дейін бас бостандығынан айыру жазасы қарастырылған.

Ол Қарағанды хоккейіне бөлген қаражатты жымқырды деген күдікке ілінді.

Айта кетейік, Арғын Нығматуллин 2007-2018 жылдар аралығында «Сарыарқа» хоккей клубының президенті ретінде қызмет атқарған. Оның жетекшілігімен қарағандылық ұжым Қазақстан чемпионы атанып, жоғарғы хоккей лигасын жеңіп алды.