Қазақстан құрамасы оқу-жаттығу жиынын бастады

Футболдан Қазақстан ұлттық құрамасы әлем чемпионаты іріктеу кезеңіне дайындық ретінде ұйымдастырылған Түркияның Анталия қаласындағы оқу-жаттығу жиынына кірісті.

Оқу-жаттығу жиыны 20 наурызға дейін жалғасады. Одан соң құрама команда Анталия — Кардифф бағытында жол жүреді.

Шетелдік чемпионаттарда доп тебетін отандастарымыз құрама қатарын 17 наурызда толықтырады.

Айта кетейік, Қазақстан құрамасы 2026 жылғы Әлем чемпионатының іріктеу турнирінде Уэльс, Лихтенштейн, Солтүстік Македония және Бельгия командаларымен бірге J тобына түсті.

Ұлттық құрама іріктеу кезеңін 23 наурыз күні сырт алаңда Уэльске қарсы ойынмен бастайды. Үш күннен соң Лихтенштейнмен кездесеміз. Екі ойын да сырт алаңда өтеді.