СҚО-да спорттық ойындарға бәс тіккен бірнеше шенеунік жұмыстан қуылды

Солтүстік Қазақстан облысында бірқатар мемлекеттік қызметкер спорттық ойындарға бәс тіккені үшін қызметінен босатылды.

Өңір прокурорлары антикоррупциялық нормалардың сақталуын талдау барысында мемлекеттік қызметшілердің жүйелі түрде букмекерлік кеңселерде ақша тіккенін анықтады.

Еске салсақ, Қазақстан Республикасының «Сыбайлас жемқорлыққа қарсы іс-қимыл туралы» заңына 2023 жылдың шілде айында енгізілген өзгерістерге сәйкес, мемлекеттік қызметкерлерге құмар ойындар ойнауға тыйым салынған.

Атап айтқанда, Ақжар ауданы әкімдігінің Құрылыс және сәулет бөлімінің бас маманы букмекерлік кеңседе тұрақты түрде бәс тіккені белгілі болды. Сонымен қатар, Ұялы ауылдық округі әкімі аппаратының және Ақжар ауданы Білім бөлімінің бас мамандары да осы заңбұзушылыққа жол берген.

Прокурорлық тексерістің нәтижесінде аталған қызметкерлер жұмыстан босатылды.