Жолдастық кездесуде Қазақстан құрамасы Кюрасаоны жеңіп жатыр

Бүгін футболдан Қазақстан ұлттық құрамасы мен Кюрасаоның жолдастық кездесуінің бірінші кезеңі аяқталды.

Бұл жөнінде Қазақстан футбол федерациясының баспасөз хатшысы Сейіл Қожатай әлеуметтік желідегі парақшасында мәлім етті.

15-минутта Максим Самородов есеп ашса, 36-минутта Асхат Тағыберген айып соққысымен есепті еселеді.

Аталған голдар Максимнің ұлттық құрама сапындағы төртінші голы болса, Асхаттың екінші голы.

2026 жылғы әлем чемпионаты іріктеу сатысында Қазақстан құрамасы J тобында сынға түседі. Қарсыластары — Бельгия, Уэльс, Солтүстік Македония және Лихтенштейн.

Матчтар 2025 жылдың наурызында басталып, қараша айында аяқталады.

Айта кетсек, Қазақстан құрамасы 22 наурызда сырт алаңда Уэльспен кездессе, 25 наурызда Лихтенштейнге қарсы ойнайды.