Қазақстандық футболшы ұлттық құрамадағы мансабын аяқтады

Футболдан Қазақстан әйелдер құрамасының белді ойыншысы Камила Құлмағамбетова халықаралық футболдағы мансабын аяқтады.

Бұл туралы Қазақстан футбол федерациясы хабарлады.

Камила Құлмағамбетова – Көкшетау футбол мектебінің түлегі. 2013 жылы жергілікті клуб «Оқжетпестің» сапында Қазақстан чемпионатындағы алғашқы матчын өткізді. 2016 жылы мансабын «БИІК-Шымкент» клубында жалғастырды. Сондай-ақ Украинада «Колос» және «Ворскла» командаларында доп тепті.

Мансабында жеті рет Қазақстан чемпионы атанып, жеті мәрте Ел Кубогын жеңіп алды. 2012-2014 жылдар аралығында 19 жасқа дейінгі Қазақстан жасөспірімдер құрамасында ойнады. 2016 жылдан бері Қазақстан ұлттық құрамасының сапына тұрақты түрде шақырту алып жүрді. Ел құрамасы сапында 26 ойын өткізіп, екі гол соқты.