Әділет Барменқұлов Қазақстан футбол федерациясына қатысты қылмыстық істе күдікті емес 

Қазақстан футбол федерациясының бұрынғы басшысы Әділет Барменқұлов федерацияға қарсы қылмыстық істе күдікте ретінде қарастырылып отырған жоқ.

Бұл жөнінде Қаржылық мониторинг агенттігі төрағасының орынбасары Жеңіс Елемесов Сенаттың жалпы отырысынан кейін тілшілер сұрағына берген жауабында айтып өтті.

- Бізде Қазақстан футбол федерациясына қатысты қылмыстық іс бар. Ол жайында әзірге сотқа дейінгі тергеудің басқа дерегін айта алмаймын. Біз тек прокуратурамен келісілген деректі жариялай аламыз. Айтарым, Барменқұлов күдікті ретінде қарастырылған жоқ, - деді Ж. Елемесов.

Әділет Барменқұлов 2022 жылы ақпанда ҚФФ президенті болып сайланды. Осы сәттен бастап ел футболының дамуының жаңа кезеңі басталды. Оның бастамасымен бұқаралық футбол, әйелдер футболы және инфрақұрылымды дамытуға арналған жобалар сәтті іске асты.